Hargeysa,(Baraarugtv.com)-“Xisbi ahaan, waannu ku faraxsannahay in xisbigayagu uu noqdo mid ay ururradu doortaan in ay la dhisaan murashixii aannu hoggaaminta dalka u soo xulnay oo CIRRO ah. Waa ta aannu KAAH ku soo dhaweynayno, aannuna ku faraxsannahay in ay doortaan in ay nala bahoobaan oo guusha nala dhaliyaan.
Ujeeddada la isu bahaysanayaa waa in dalka la badbaadiyo oo rejada shacabka la xaqiijiyo. Taas ayaa gacmaha la isu qabsanayaa, iskaashiganina kuma joogi doono xisbiga WADDANI iyo ururka KAAH oo keliya ah, waana mid koobsanaya cid walba oo u diyaarsan in ka qaybgasho, isbeddelka khayrka qabana ay nala dhaliso.
Siyaasaddu waa muxaafad iyo mucaarad, wax u dhexeeyana ma jirto, xisbiyada iyo ururrada oo dhanna ujeeddada isu keeni kartaa waa in talada laga dhacsado muxaafidka oo bulshada loo dhaamo, waana middaas ta KAAH isu kaaya keentay, aannuna ugu baaqaynno ururrada kale, siyaasiyiinta madaxa bannaan iyo cid kasta oo aannu isku dan noqonno.Soo dhawaada, albaabbaduna waa ay idiin furan yihiin!”ayuu yidhì Guddoomiyaha xisbiga Waddani Xirsi.
