Madaxweyne Yoweri Museveni iyo Marwadiisa Janet Museveni oo Cafis Weydiistay Shacabka Uganda
Uganda,(Baraarugtv.com)-Madaxweynaha Uganda Yoweri Museveni,
oo xafiiska hayay muddo dhan 39 sano,iyo marwadiisa ahna Wasiirka Waxbarashada, Janet Museveni, ayaa si lama filaan ah cafis weydiistay shacabka Uganda, iyaga oo si daacad ah u qirtay in ay jireen khaladaad ay sameeyeen intii ay xilka hayeen.
Madaxweynaha oo khudbad jeediyay ayaa sheegay in hoggaamintu aysan mar walba fududayn, islamarkaana ay jiraan go’aammo adag oo la qaato kuwaas oo mararka qaar saamayn taban ku yeesha shacabka. “Waan ognahay in aanu ka khaldannay meelaha qaar. Waxaanu idinka codsanaynaa cafis, si aan u horayno u wada socono, gacmo is haysta,” ayuu yiri Museveni.
Janet Museveni, oo dhankeeda ka hadashay, ayaa ku dheeraatay muhiimadda ay leedahay in madaxdu ay shacabka la xisaabtamaan. “Khalad kasta oo dhacay, waxaan u aragnaa cashar iyo fursad wax ka barasho. Waxaan idinka rajaynayaa garasho iyo naxariis,” ayay tiri.
Bayaan noocan ah oo ka yimaada qoyska madaxweynaha ayaa noqday mid si weyn uga yaabiyay shacabka iyo falanqeeyeyaasha siyaasadeed ee dalka, iyadoo dad badan ay tallaabadan u arkaan bilow cusub oo ku wajahan dib u heshiisiin iyo hoggaan daahfuran.
