Itoobiya,(Baraarugtv.com)-Siyaasiga mucaaradka ah ee Kenya, Faarax Macallin, ayaa ugu baaqay dalalka Eritrea, Soomaaliya, Jabuuti iyo Sudan inay sameystaan isbahaysi is-difaac oo mideysan, si ay uga hortagaan waxa uu ku tilmaamay “damaca dhul-ballaarsiga” ee Itoobiya. Qoraallo uu soo dhigay barta X ayuu ku eedeeyay madaxda Itoobiya inay wadaan “gorgortan kibir leh” oo ku dhisan “taariikh la been-abuuray iyo taageero aan xad lahayn oo reer Galbeed ah,” isagoo ka digay in Ra’iisul Wasaare Abiy Ahmed uu khatar ugu jiro inuu sii xoojiyo “burburka Itoobiya” isagoo adeegsanaya damac dhul-ballaarsi.
Faarax Macallin ayaa xusay in Itoobiya, sida Uganda, Rwanda, Burundi iyo South Sudan, ay tahay dal aan bad lahayn, balse aysan taasi sharci u siin inay dhul ka qabsato deriskeeda. Wuxuu sheegay in dalalka aan badda lahayn ay ku habboon tahay inay deriskooda kala xaajoodaan marinno badeed oo nabad ah. Wuxuu dib u xusuustay iska hor’imaadyo hore oo gobolka ka dhacay, sida jabkii Soomaaliya ka soo gaaray dagaalkii 1978-kii iyo faragelintii Itoobiya ee Muqdisho 2006, taas oo uu sheegay inay Itoobiya ku qaadatay khasaare culus. “Ma jiro hoggaamiye Itoobiyaan ah oo caqli qaba oo weerari doona Soomaaliya,” ayuu ku adkeystay.
Digniinta Faarax ayaa timid iyadoo Ra’iisul Wasaare Abiy Ahmed, xafladdii buuggiisa Medemer ee Addis Ababa, uu meesha ka saaray doodaha sheegaya in Itoobiya u qaddaran tahay inay ahaato “maxbuus juqraafi ah” oo aan marin-badeed lahayn. Hadalladaasi waxay muujinayaan xiisadaha sii kordhaya ee ku saabsan marin-badeedka Badda Cas iyo baahida loo qabo wada-hadal iyo iskaashi dhexmara dalalka Geeska Afrika.
