Shacabka Soomaaliya Oo Si-weyn Uga Naxay Qaabka Shirkaddaha Turkiga ula-wareegeen Shiidaalkii ku jiray Soomaaliya &Qaabka Loo wareejiyey Oo Hadda la Kashifay Ceebtiisa
Hargeysa(Baraarugtv.com)-Heshiiska cusub ee shidaalka ee Soomaaliya iyo Turkiga ayaa si weyn u soo jiitay dareenka bulshada, iyadoo la isweydiinayo in casharradii laga bartay heshiisyadii hore ee shirkadaha Turkiga, sida Albayrak iyo Favori, in lagu saleeyay heshiiska cusub iyo in loo galay qaab ay ka muuqato fudayd iyo xamaasad badan.
Shirkadaha Turkiga ee Albayrak iyo Favori, kuwaas oo maamula dekedda iyo garoonka diyaaradaha ee Muqdisho tan iyo 2013 iyo 2014 siday u kala horreeyaan, ayaa lagu eedeeyay in aysan u hoggaansamin shuruudaha heshiisyada ay la galeen dowladda Soomaaliya. Warbixinno ka soo baxay xafiiska Hantidhowrka Qaranka ayaa muujinaya in shirkadahani ay ku guuldareysteen inay soo gudbiyaan warbixino maaliyadeed si aan looga xisaabtamin, taasoo keentay mugdi ku saabsan dakhliga ay dowladda ka hesho ilahaas muhiimka ah .
Shirkada ayaa sidoo kale laga dayriyay sida ay ula dhaqmaan shaqaalaha Soomaaliya. Dhowr mar oo lagu banaanbaxay waxa ay bilaabeen in ay meesha ka saaraan inta badan shaqaalaha Soomaaliya ayna shaqaalaysiiyaan shaqaale Ajaanib ah oo iskugu jira kenyaan iyo Uganda.
Heshiiska cusub ee shidaalka, oo la saxiixay bishii Maarso 2024, ayaa u oggolaanaya Turkiga inuu baaritaan, horumarin, iyo soo saarid ku sameeyo saddex qaybood oo badda Soomaaliya ah, mid walba oo dhulkiisu yahay 5,000 km². Sidoo kale, waxaa lagu daray sahamin dhulka gudaha ah. Markabka Oruc Reis ayaa bilaabay sahmin bisha Oktoobar 2024, taasoo socon doonta ilaa dhamaadka sanadkaan.
Si kastaba ha ahaatee, faahfaahinta sida saamiga faa’iidada loo qaybsanayo Soomaaliya si rasmi ah uma shaacin inkastoo ay soo bexeen nuqulo muujinaya in Turkey qaadanayso saamiga ugu badan.
Tani waxay keentay walaac ku saabsan hufnaanta iyo xisaabtanka heshiiska, iyadoo la xasuusan yahay dhibaatooyinkii ka dhashay heshiisyadii hore ee Albayrak iyo Favori .
Heshiiska cusub ee shidaalka ee u dhexeeya Soomaaliya iyo Turkiga wuxuu leeyahay fursado iyo caqabado. Si looga faa’iideysto fursadahaas, waxaa muhiim ah in dowladda Soomaaliya ay ka faa’iideysato casharradii hore ee heshiisyada Albayrak iyo Favori, iyadoo la hubinayo in heshiiska cusub uu yahay mid hufan, cadaalad ah, oo danaha shacabka Soomaaliyeed lagu ilaaliyo.
Xigasho Inside Somalia.
